ලිපේ ගින්දර නිවෙන්නට මත්තෙන් තවත් වෑංජනයක්‌ ලිප මත තබන්නා සේ එක්‌ මැතිවරණයක උණුසුම නිම වන්නට මත්තෙන් තවත් මැතිවරණයක්‌ ආරම්භ වීම දැන් අපට පුරුදු වී තිබේ. පසුගිය වසරේ මේ රට මුහුණ දුන් මැතිවරණ ප්‍රමාණය කොපමණද? ප්‍රාදේශීය සභා, පළාත් සභා, නගර සභා, ජනාධිපතිවරණය, මහා මැතිවරණය ආදී වශයෙන් ගෙවුණු කාලය එයට නිදසුන්ය. කුමක්‌ වුවත් පාර්ලිමේන්තු මැතිවරණය නම් පැවැත්වෙන්නේ නියමිත කාල වකවානුව ඇතුළතම බවද කිව යුතුය. මැතිවරණය යනු ප්‍රජාතන්ත්‍රවාදී ක්‍රමයේ හරය වුවත් ඒ බර රටට වැඩි බවද සමහරු කියති. දේශපාලඥයා යනු රටක් පාලනය කරන තැනැත්තා ය. ඔහුට හෝ ඇයට රටක සංවර්ධනය ඇති කිරීම, විදේශ බලපෑම් වලින් රට බේරා ගැනීම, අභ්‍යන්තර ආරවුල් නිරාකරණය කිරීම ආදී පරිපාලනය එසේත් නැත්නම් පාලනය කළමනාකරණය කර ගැනීමේ වගකීම ජනතාව විසින් පවරනු ලබන්නකි. ඡන්ද විමසීමක්‌ සිදු කිරීමේ සැබෑ අරුත නම් එය යි. ජනතාව කිසියම් පුද්ගලයෙකුට තමන්ගේ වටිනා ඡන්දය ලබා දීමෙන් අපේක්‍ෂා කරන්නේ අදාළ පුද්ගලයා රටට, ජාතියට, ආගමට, ගමට, රට වැසියාට පිහිට වේවි හෝ දියුණුව වෙනුවෙන් පොදු මෙහෙවරකට කැප වේවි යන විශ්වාසය ඇතිව ය. ඔහු හෝ ඇය එම මෙහෙවර නිසි පරිදි ඉටු නොකළහොත් එසේත් නැතහොත් ජනතා අපේක්‍ෂා යම් තරමකට හෝ ඉටු කර නොදුන්නහොත් ඊළඟ මැතිවරණයේදී ජනතා මනාපය එකී අපේක්‍ෂකයන්ට නොලැබෙනු ඇත. පොදුවේ තමන් බලයට පත් වන ප්‍රදේශයට යම් කිසි සේවයක්‌, පොදු පහසුකම් නංවාලීමක්‌ බලයට පත්වන පුද්ගලයා විසින් සිදු කරන්නේ නම් නිරායාසයෙන් ම ඒ හරහා ජනතාවගේ ඕනෑ එපාකම් ද ඉටු වනු ඇත.
එහෙත් තමාගේ බඩගෝස්තරය වෙනුවෙන් ජනතාව නොමග යවමින් දේශපාලනයේ යෙදෙන පිරිසක්ද ලාංකීය දේශපාලන වේදිකාවේ රග දෙන්නෝය. එවන් අයට සමාජයේ කිසිම තැනක් නැති විය යුතු වුණත් ඔවුන්ව රැක ගන්නා ජනතාවක්ද බිහිව සිටීම ඉතා කනගාටු දායකය. බොහෝ විට එක වේදිකාවකට නැගී මුසාවාදයෙන් ජනතාව රවටා පාර්ලිමේන්තුවට යන පුද්ගලයා ඉන්පසු එන මැතිවරණයකදි පරාජය කළ යුත්තේ ජනතාව අතින්ය. නමුත් එකී බොරු කී පුද්ගලයාම නැවත නැවතත් පාර්ලිමේන්තුවට තේරී පත්කරවීමට තරම් ලාංකීය ජනතාව ඉදිරිපත් වීම කණගාටු දායකය.
එසේ බොරු කියන්නාවූ නිවට දේශපාලඥ්යන් තම පක්ෂයේ රදවා ගනිමින්, ඔවුන්ට රැක වරණය ආරක්ෂාව දෙමින් ඔවුන්ගේ නායකයා, එසේම රටේ නායකයා කරන්නේ මහා නිවට ක්‍රියාවක් බව ජනතාව තේරුම් ගත යුතුය. එසේම එවන් ඇමතිවරු සමග එකට ඇමති මණ්ඩලයේ සිටින කිසිවෙකුටත් ලැජ්ජාවක් නැත්තේමය. ඒ ඔවුන්ගේ ක්‍රියා කළාපයද එක හා සමාන වන නිසාය. එසේ එක බොරුවක් කියා අසරණ වූ තැන, එම බොරුව වසා දැමීමට බොරු දහසක් කියන්නාවූ දේශාපලුවන් දිනවීමට තැත් නොකර සාධාරණ, ප්‍රජාතන්ත්‍රවාදී නායකයෙක් යටතේ රටක් පාලනය වනු දැකීමට තරම් උනන්දුවක් ලාංකික ජනතාවට ඇති වන්නේ කවදාද?
උසාවියකදී බොරු සාක්ෂි ඉදිරිපත් කරන්නාවූ ජනතාවට නීතිය අකුරට ක්‍රියාත්මක වන්නා සේම, මෙවන් බලයේ සිටින ඇමතිවරුන්ට පවා එම නීතිය අකුරට ක්‍රියාත්මක නොවීම කණගාටුදායකය.
තැලෙන පොඩිවන ජනතාව සදහා ප්‍රජාතන්ත්‍රවාදය උදාකරලීම වෙනුවෙන්...
© S F | Online Media.
No comments:
Post a Comment